14 октября 2025
Саха өрөспүүбүлүкэтин судаарыстыбаннай, муниципальнай сулууспаларын уонна судаарыстыбаннай муниципальнай тэриллиилэрин (саха тыллаах) үлэһиттэрин болҕомтолоругар!
Бу дьыл алтынньы 27 күнүттэн сэтинньи 3 күнүгэр диэри М.К.Аммосов аатынан Хотугулуу-Илиҥҥи бэдэрээлинэй үнүбэрситиэт Хотугулуу-Илиҥҥи норуоттарын уонна култуураларын үнүстүүтэ “Саха тыла судаарыстыбаннай салайыы эйгэтигэр” 72 ч. идэни үрдэтэр куурус ыытар.
Куурус ааптардара саха тылын билиҥҥи туругун чинчийэн көрөн, сайдар кэскилин учуоттаан туран, эһиэхэ анаан маннык тыын боппуруостары сырдатыахтара:
— Сахалыы дьыала истиилин уратыта (Л.Е. Манчурина);
— Сахалыы дьыала тылын-өһүн лиэксикэтэ (С.В. Иванова);
— Сахалыы дьыала тылын-өһүн кырамаатыката (Е.С. Герасимова);
— Сахалыы тиэрмини оҥоруу, сахатытыы (Г.Г. Торотоев);
— Тэрилтэ сахалыы аатын сөпкө оҥоруу (Н.А. Ефремова);
— Дьыала тылын-өһүн сахалыы тылбааһа (А.А. Васильева);
— Дьыала тиэкиһин тылбааһын оҥоруу (И.В. Собакина).
Куурус матырыйаалын Хотугулуу-Илиҥҥи бэдэрээлинэй үнүбэрситиэт үөрэнэр ситим сиригэр киирэн толору билсиэххитин сөп. Лиэксийэлэр, наадалаах матырыйаал, ыйынньык, туһанар литэрэтиирэ элэктириэн барыйаана барыта ситим сиргэ ыйанар. Куурус кыттыылаахтарыгар маны барытын туһанар кыах бэриллэр. Куурус түмүгүнэн үөрэммити туоһулуур судаарыстыбаннай мэктиэлээх дастабырыанньа бэриллэр.
Сайаапкаҕытын бу дьыл алтынньы 22 к. яндекс-диискэҕэ бу сигэнэн киирэн толоруҥ: https://disk.yandex.ru/d/hZymIEM3SLTIPg
Куурус туһунан 89142637240 төл. ыйытыаххытын сөп (эпп. «АЙ-ТАЛ» киин салайааччыта Прокопьева Амалия Владиславовна).
Суруйтарыҥ, үөрэниҥ, идэҕит таһымын үрдэтиҥ!
