Дьокуускайга Сивцева Елена Петровна 45 сыллаах айымньылаах үлэтин бэлиэтиир кэнсиэрэ буолан ааста

Кулун тутар 19 күнүгэр А.Е. Кулаковскай аатынан норуоттар доҕордоһууларын Дьиэтигэр «ДУУҺАМ ИЭЙЭР АБЫЛАҤА» концерт Дьокуускай куорат олохтоохторугар, ыалдьыттарыгар, күндү биир дойдулаахтарбытыгар уонна үҥкүү кэрэ эйгэтин кэрэхсээччилэригэр урдук таһымнаахтык буолан ааста.

Сахабыт сирин биллиилээх үҥкүү туруорааччыта, бастыҥ балетмейстера, РФ үөрэхтээһинин туйгуна,  Саха Өрөспүүбүлүкэтин култууратын туйгуна, РФ уопсай үөрэхтээһинин бочуоттаах үлэһитэ, «СӨ Учууталлар учууталлара» знак хаһаайката, Чурапчы улууһун «Радость» оҕо дьоҕурун сайыннарар киинин үрдүк категориялаах педагога  СИВЦЕВА ЕЛЕНА ПЕТРОВНА 45 сыллаах айымньылаах үлэтин бэлиэтээтибит.  Кыттыыны ыллылар: Чурапчыны аар-саарга аатырдыбыт «Көлүкэчээн», «Дьиэрэҥкэй» үҥкүү народнай коллективтара, выпускниктара, Чурапчытааҕы оҕо музыкальнай оскуолатын выпускниктара,  Дьокуускайтан «Оникс» (Гагарин аатынан культура киинэ), «Одун» (Подростковай киин), Чурапчы улууьуттан «Радость» о5о дьо5урун сайыннарар киин «Дархан», «Умсулҕан», «Лучики радости», «Сардаҥа» (Одьулуун), «Үрдэл» (Төлөй») үҥкүү коллективтара, «Улыбка» уһуйаантан «Мичээр» үҥкүү ансаамбыла.

Ырыаннан киэргэттилэр: Тайыына (Марианна Романова), Маргарита Кириллина, «Айгыл» образцовай фольклорнай бөлөх, Николай Терютин, Сайаана Сивцева, Евгения Юмшанова. Концерпыт режиссера РФ уопсай үөрэхтээһинин бочуотаах үлэһитэ, СӨ култууратын уонна үөрэҕэриитин туйгуна, Өрөспүүбүлүкэтээҕи норуот айымньытын дьиэтин сүрүннүүр специалиһа, өр кэмҥэ Елена Петровналыын бииргэ үлэлэспит коллегата Николай Николаевич Терютин үрдүк сатабылынан салайан концерт үрдүк таһымҥа ааста.

Елена Петровна айар үлэтин сэҥээрээччилэрэ, сүгүрүйээччилэрэ сааланы толору тоҕуоруһа мустубуттарын көрөн киһи үөрэр, хас биирдии нүөмэргэ ньиргиэрдээх ытыс тыаһа концертка кытааччылар сүргэлэрин көтөхтө. Дьоро киэһээбитин Үөрэх министерствотыттан «Юные якутяне» республикатаа5ы тирэх киин методиһа Александра Саввична Архипова, Саха Өрөспүүбүлүкэтин Ытык сүбэтин председателин солбуйааччыта Иннокентий Николаевич Аммосов,улуустааҕы Культура салалтатын начальнига Петр Егорович Гуляев, улуустааҕы «Радость» оҕо дьоҕурун сайыннарар киин директора Ирина Семеновна Сергеева уо.д.а. эҕэрдэлээтилэр уонна Саха Өрөспүүбүлүкэтин үөрэҕириитин министерствотыттан «Педагог — Наставник» үрдүк ааты иҥэрдилэр.
Күндү коллегабытыгар баҕарыа этибит айар үлэтигэр үрдүк ситиһиилэри, кытаанах доруобуйаны.