Новости

18 января 2018 г. | Персонифицированное финансирование › Новости

Сертификат оҕоҕо талар кыаҕы биэрэр

Быйыл Саха Өрөспүүбүлүкэтигэр иккис сылын эбии үөрэхтээһин саҥа модела олоххо киллэриллэр. Саҥата диэн тугуй диэтэххэ -- үбүлээһинэ персонифицированнай.

 

Сэрэйбиккит курдук, бу эмиэ эксперимент. Былырыын киин куоракка Дьокуускайга хайдах саҕаламмытын хаһыаппытыгар сырдаппыппыт. Оттон быйыл эксперимеҥҥэ улуустар кыттыһыахтаахтар.

 

Эксперимент суолтата тугуй?

 

Судаарыстыба биһиги оҕолорбутун босхо эбии үөрэхтээһининэн хааччыйыыны мэктиэлиир. Эксперимеҥҥэ кыттар хас биирдии оҕоҕо сертификат бэриллэр, ол сууматын муниципалитеттар, улуустар бэйэлэрэ быһаараллар. Оттон, эбии үөрэхтээһининэн чопчу ханнык хайысханан, тугунан дьарыктаныаҕын, сыаллаах сертификатын туохха туһаныаҕын, оҕо баҕатын учуоттаан, оҕо төрөппүтүнүүн бэйэлэрэ талаллар. Онон, хас биирдии педагог, үөрэнээччи чуолаан кини куруһуогун талан ыларыгар интэриэстээх буолар, кыһаллар. Ол эбэтэр, үбүлэннэҕинэ кини бырагыраамата салгыы сайдар кыахтанар.

 

Алена Семенова, “Юные якутяне” Өрөспүүбүлүкэтээҕи ресурснай киин старшай методиһа:

 

-- Былырыын сэтинньигэ РФ Бырабыыталыстыбата “Доступное дополнительное образование для детей” диэн приоритетнай федеральнай бырайыагы бигэргэппитэ. Ол сүнньүнэн, дойду 5-тэн 18-гар диэри саастаах оҕотуттан 10 бырыһыана персонифицированнай үбүлээһининэн хааччыллыахтаах. Саха сиригэр хайыы үйэҕэ 6044 оҕоҕо сертификат туттарыллыбыта. Быйыл, иккис сылбытыгар, өрөспүүбүлүкэ 36 улууһуттан 27-тэ (75%) бырайыакка кыттарга бэлэмин биллэрдэ. Ол аата, быйыл 2017 сылга балаҕан ыйыттан ахсынньыга диэри 15566 оҕо именной сертификат тутуоҕа.

 

Оттон 2018 сылга дойдуга оҕо 20 бырыһыана анал сертификатынан хааччыллыаҕа.

 

Бэлиэтээн эттэххэ, бу бырайыакка ДЮСШ-лар итиэннэ ДШИ-лэр -- искусство оскуолалара кыттыбаттар, тоҕо диэтэххэ кинилэр эбии идэтийии иннинээҕи (предпрофессиональные) бырагыраамалары олоххо

 

киллэрэллэр. Биһиги сыалбыт-сорукпут – кыра дохуоттаах, кыаммат араҥаҕа киирсэр төрөппүттэрдээх оҕолору, элбэх оҕолоох ыаллар ыччаттарын итиэннэ олох уустуктарыгар түбэспит оҕолору босхо эбии үөрэхтээһининэн хааччыйыы буолар. Бу оҕолор ортолоругар араас талааннар бааллар, сертификаттара кинилэргэ сөбүлүүр куруһуоктарыгар, чааһынай, төлөбүрдээх да куруһуоктарга дьарыктаналларыгар кыаҕы биэрэр.

 

Саҥа портал аһыллыаҕа

 

Ити курдук, бу бырайыакка судаарыстыбаннай да, судаарыстыбаннайа суох да – үөрэтэргэ лицензиялаах чааһынай да тэрилтэлэр кыттар бырааптаахтар. Онон, тэрийээччилэр этэллэринэн, доруобай конкуренция баар буоллаҕына – үөрэтэр өҥөлөрү оҥоруу хаачыстыбата үрдүүр эрэ. Ол эбэтэр, оҕолор, төрөппүттэр бастыҥтан-бастыҥнары эрэ талан ылыахтара. Хас биирдии кыттааччы бэйэтин үөрэтэр бырагырааматын хамыыһыйа иннигэр көмүскүүр. Итиэннэ манна санатан эттэххэ, олох ирдэбилинэн, бастакы кэккэҕэ техническэй уонна естественнэй-научнай хайысхалардаах куруһуоктар туруоруллаллар. Ол гынан баран, айар куттаах оҕо бэйэтэ тугу сөбүлүүрүн талар – бу сүрүнэ.

 

Нюрбина Габышева, Өрөспүүбүлүкэтээҕи лицей-интэринээт дириэктэрин иитэр үлэҕэ солбуйааччы, “Дьоҕур” судаарыстыбаннайа суох уопсастыбаннай тэрилтэ внештатнай үлэһитэ:

 

--Бу систиэмэ биир үчүгэйэ – аһаҕас. Хайа баҕарар төрөппүт порталга киирэн, ханна, ханнык куруһуоктар баалларын көрөр, талар. Биһиги судаарыстыбаннайа суох “Дьоҕур” уопсастыбаннай тэрилтэбит математиканы дириҥэтэн үөрэтиигэ анал бырагыраамалаах. Ааспыт сайын 240 оҕо дьарыктаммытыттын 70-на сертификаттаах этэ. Биллэн турар, төрөппүт барыта оҕото анал сертификаты ылан, босхо дьарыктаныан баҕарар, онон, персонифицированнай үбүлээһин сайдан, сертификат элбиэн наада дии саныыбын.

 

Сотору, “Юные якутяне” Өрөспүүбүлүкэтээҕи ресурснай киин федеральнай киини кытта ситимнээхтик үлэлэһэр Регионнааҕы модельнай киин статуһун ылыахтаах. Онон, оҕолору эбии үөрэхтээһин муниципальнай кииннэрэ бырагыраамынай, методическай, каадырабай, информационнай өттүнэн өйөбүллээх буолуохтара.

 

“Эбии үөрэхтээһин” диэн анал портал аһыллан үлэлиир, онно киирдэххэ, киин үлэтэ барыта көстөн кэлиэҕэ. Аныгы оҕо үксэ телефоннаах, айпаттаах, киирэн бэйэтэ да “лайк” туруоруон, биитэр куруһуок үлэтин туһунан санаатын үллэстиэн эмиэ сөп.

 

Бу барыта, эбии үөрэхтээһин хаачыстыбата тупсарыгар туһуланар.

 

Босхо билсэр телефон

 

8-800-250-66-57

 

Татьяна Маркова.